Heimsmarkmið Sameinuðu þjóðanna

Sjálfbærni er eitt af grunngildum Alheims, hagur og velferð manna og dýra í framtíðinni og hvernig hægt verður að ná langtíma markmiðum. Afar mikilvægt er að sú kynslóð sem nú elst upp sé meðvituð um umhverfið og um það hvernig ákvarðanir sem nú eru teknar hafa áhrif á framtíðina.

Verndun hafsins, loftslagsbreytingar, endurnýting og minnkun neyslu eru meðal þeirra viðfangsefna sem verða tekin fyrir á setrinu. Við sjáum fyrir okkur komandi kynslóðir sem bæði flokka og plokka. Vísindasetrið gegnir því mikilvægu hlutverki í aukinni virkni samfélags í átt að sjálfbærni. 

Jafn aðgangur fyrir öll er mikilvægur og hugað verður að minnihluta- og jaðarsettum hópum með hófstilltri verðlagningu. Vísindasetrið er ekki hagnaðardrifið heldur byggir á þeirri hugsjón að gera menntun og fræðslu aðgengilega fyrir öll. Alheimur styður við forvarnarstarf í landinu þá einkum með tilliti til heilsu og geðheilbrigði barna og ungmenna.